世界盃：死亡F組開打！首輪鬥荷蘭 藍武士氣勢勁再劏歐洲兵_東方日報

今晚世盃死亡F組首輪即上演重頭大戰，由荷蘭惡鬥日本。本來已今非昔比嘅荷蘭，近日防線爆發傷兵潮，實力進一步受削，相反「藍武士」連場報捷之餘，近年又專殺歐洲兵，讓球主客和仲有得受讓咁筍，讓球客勝（+1）不容錯過。（Now 618及616周一凌晨4時直播）文:法達斯維

歐洲褪色強隊荷蘭，賽前收到噩耗，可打右閘同中堅嘅祖利安添巴因傷退隊，對防線影響唔細；而日前贏烏茲別克2比1之役，兩個入球都係來自加普操刀嘅12碼，進攻似乎冇乜板斧，正宗攻不銳、守不穩。

攻守兼備受讓抵玩
以往盛產射手嘅「風車國」，今屆無論係加普、唐耶爾馬倫、森馬維、韋格賀斯或迪比，唔係太嫩就係太老，同告魯夫、雲巴士頓、柏金、雲尼斯達萊、尹佩斯等神鋒相比，真係連車尾燈都望唔到，加上近年喺主帥朗奴高文帶領下表現符符碌碌，近3仗亦只得1勝1和1負，不宜高估。

亞洲勁旅日本決賽周前豪取6連勝之餘，更有5場保持清白之身，攻守兼備。事實上，就算三笘薰、南野拓實因傷落選，但主帥「一哥」森保一麾下，仍有堂安律、鐮田大地、久保建英、上田綺世等於歐洲搵食嘅球員可用，實力強勁。何況「藍武士」近年對住歐洲球隊特別醒神，之前9次對歐洲兵法定時間獲8勝1和，包括上屆世盃鬥德國、西班牙及克羅地亞取得2勝1和，又點會驚呢隊荷蘭呀，讓球客勝（+1）好路。

广东聘多多 gdpdd.com 广东招聘网 广东人才网 广东找工作