歐聯：主場出擊信心保證 阿仙奴次回合贏德_東方日報

歐聯4強次回合生死戰，阿仙奴主場同馬德里體育會再決高下！兩支以首奪冠軍為目標嘅勁旅，首回合踢成1比1平手，實力旗鼓相當，不過阿仙奴喺酋長球場出擊係信心保證，相反馬體會近年作客英超球隊「九死一生」，熱捧主勝。（Now 643周三凌晨3時直播）文:工廠仔

向英超同歐聯「雙冠」進發嘅阿仙奴，今屆喺歐聯表現非常穩定，13場比賽拎到10勝3和佳績，其中喺酋長球場出擊更見霸氣，6次主場獲得5勝1和，包括3比1擊敗另一支4強球隊拜仁慕尼黑，以及4比0大炒今場對手馬體會，主場威力足以摧毀歐洲頂尖球隊。

好消息係「兵工廠」近期傷兵陸續復出，布卡約沙卡、伊比爾治伊斯傷愈後逐漸上力，啱啱喺英超大勝富咸，就重現久違嘅銳利進攻；狀態大勇嘅瑞典前鋒約基利斯，近2次對馬體會攻入3球，似乎對攻破呢支西甲球隊特別有心得。防線續由威廉沙列巴、加比爾馬加希斯鎮守，今屆6場主場有4場保持不失，攻守能力都有保證。

馬德里體育會訪英倫凶多吉少
馬體會首回合未能喺主場贏波，今場形勢變得惡劣，佢哋最近7場作客5次落敗，離開主場表現大為走樣。而且馬體會面對英超球隊慣性被「食住」，近7次喺歐聯作客英超球隊，有6次輸波而回，今屆就接連敗走阿仙奴、利物浦同熱刺嘅主場，今場恐怕凶多吉少。
广东聘多多 gdpdd.com 广东招聘网 广东人才网 广东找工作