熱身賽：「金毛飛」組合睇得又打得 巴塞砌大邱再嚟入球騷_東方日報

巴塞隆拿今晚繼續亞洲之旅南韓站，同另一支韓職球隊FC大邱「拍跳」。巴塞以拉明耶馬為首嘅「金毛飛」組合，火力全開弗到冇朋友，上場就以7比3大炒FC首爾，加上表演賽志在娛樂球迷，隨時同FC大邱再演入球騷，中位數5.5球照捧大盤。（HOY TV 76台周一晚7時直播）文:法達斯維

巴塞嘅亞洲之旅經歷一波三折，好彩總算順利起行，先喺日本站輕取神戶勝利船3比1，上周中嚟到南韓站首仗出戰FC首爾，雖然賽前以兩位前曼聯師兄弟拉舒福特同連格異地交鋒作為噱頭，但風頭都係畀「新球王」拉明耶馬完全蓋過，呢位新10號仔只係踢半場已經梅開二度，加上FC首爾冇縮瘋狂鬥攻，兩隊合共炮製咗10個入波，最終巴塞大炒7比3，球迷睇到大叫過癮，亦證明呢類「拍跳」雙方都不設防，志在令觀眾睇得高興。

熱身賽娛樂球迷至上
耶馬今夏以新形象「金髮公仔麵頭」示人，連師兄加維同老大哥羅拔利雲度夫斯基都癲埋一份，「羅拔佬」染咗金毛感覺後生咗，之前傷病多多嘅加維，據聞係耶馬慫恿下「變髮」，某程度兩人係向偶像兼前巴塞球星尼馬致敬，呢個「金毛飛」組合喺對FC首爾都有士哥，可謂「睇得又打得」，入波當食生菜。

另邊廂，FC大邱喺韓職排緊包尾，實力仲衰過FC首爾，今場純粹搵銀，而且難得同「地上最強」同場較技，冇乜心理包袱下唔怕鬥攻，大家食住晚飯等睇入球騷。