德乙：史浩克哈化開咧大激鬥_東方日報

老對手埋牙一撻即着
新一季德乙開騷，周六凌晨揭幕戰史浩克04主場迎戰哈化柏林。兩隊可謂難兄難弟，22至23年球季雙雙由德甲降班，近兩季喺德乙同樣排中游，今季都會繼續拍住上，雖然係開鑼戰，但兩隊已經對慣對熟，相信唔會有保留，加上雙方近9次交手全開3球或以上，2.5球入球大高唱入雲。

（Now 639周六凌晨2時30分直播）文:邪神

史浩克04上季德乙有段時間持續不振，一度被捲入降班漩渦，全靠季中發力搶分，加上護級對手表現更差勁，令佢哋逃過降班厄運，睇番球隊上季表現，全季攻入52球尚算過得去，但後防疲弱，總共失62球屬德乙第3差成績，幾乎每場都有失球，保持清白場次寥寥可數，而且極容易出現大比數賽果，加上佢哋4位門將其中之一就係前利物浦「膠龍」卡利奧斯，不難想像其防線表現會係點。

入得失得留意「7+」
哈化柏林近兩季都能站穩德乙中游，成績比史浩克04稍好，同樣靜待重上德甲時機降臨，佢哋今夏有中場主力伊巴謙馬沙轉投利華古遜，但已借入拜仁慕尼黑中場卡頓馬查，實力唔會有太大變化；球隊踢法亦唔保守，特別係作客入得又失得，近5場聯賽作客有3場開出大比數，近年對史浩克04經常大手交易，開過兩次總入球「7+」，試過5比2擊敗對方，但亦曾以2比5落敗，相信今場雙方毋須試探，一嚟就駁火，2.5球入球大好易夠數。