北美聯：洛杉磯搶W盡情碌卡_東方日報

北美聯盃次輪賽事，美職勁旅FC洛杉磯硬撼墨超球隊帕丘卡。FC洛杉磯一向重視北美聯盃，首輪大意失分，今遇帕丘卡不容再失，主勝有計。

（周六早上10時30分開賽）文:法達斯維

今屆北美聯盃改咗制，36隊分成兩組，18支美職球隊一組，18支墨超球隊一組，每隊將會同另一組球隊打3場，每組前4名先可進身8強，每仗勝方3分、和波1分、輸波冇分，但法定時間打和就需要互射12碼，射贏嗰隊會有多1分。

FC洛杉磯於世冠盃分組賽出局後，雖然有前法國國腳箭頭基奧特離隊，但近6場獲3勝2和1負兼只得1場食白果，攻力未受太大影響。呢支美職球隊一向重視北美聯盃，上屆獲得亞軍，近6場北美聯盃法定時間獲4勝1和1負，日前首輪對FC馬薩特蘭竟然大意打和1比1兼射輸12碼攞得1分，為出線今仗要全力爭勝。

帕丘卡狀態麻麻
另邊廂，墨超球隊帕丘卡喺聯賽表現一般，早前喺世冠盃分組賽亦3戰全敗，上屆於北美聯盃3戰法定時間只得1和2負，雖然佢哋日前喺首輪險勝3比2，不過對手只係聖地亞哥FC，不宜高估，今遇搶分心切嘅FC洛杉磯，相信凶多吉少。