阿甲：近年碰頭少交收 班菲特細鍊巴拉卡斯_東方日報

聽朝阿甲直播場次，由班菲特主場迎戰巴拉卡斯中央。班菲特一向攻力疲弱，就算主場出擊亦不宜高估，巴拉卡斯中央經歷上場慘敗，必定加強防守，而且近年碰頭例少交收，捧1.5球細盤更划算。（HOY TV 76台周二早上6時58分直播）文:法達斯維

班菲特上場以2比1擊敗紐維爾舊生，總算係止跌，不過呢支老牌球隊，近18場阿甲連阿根廷盃，贏得3場咁大把，其中有8場食白果。單計聯賽首循環16場入得14粒，就知道佢哋係唔識入波。不過凡事都有兩面，班菲特雖然攻力偏弱，但上述16場聯賽僅失19球，防守亦算唔差，相信今場會穩陣行先。

萊斯查近9場7開半和
巴拉卡斯中央喺聯賽首循環排名高班菲特一截，但上場竟然喺自己地頭淨吞利華達維亞獨立3蛋，防線表現鬆散，踢得咁差冇晒飛士，今場一定要先做好防守。翻查紀錄，雙方近5次碰頭，巴拉卡斯中央取得2勝2和1負，稍稍佔上風，除此之外，呢5場總入球全開1球或以下，其中有兩場「窿窿」，可見大家都踢得十分保守，唔慌多波入，寧捧入球細。

另一場凌晨開波嘅阿甲，萊斯查主場硬撼圖庫曼體育會。萊斯查出晒名比賽初段先求唔輸，各項賽事近9場有7次開半場和，遇上狀態不俗嘅圖庫曼體育會，更加唔敢輕舉妄動，半場和不妨追多鋪。（周二凌晨2時58分開賽）