女歐國：愈戰愈勇追擊意大利 英格蘭主W食過翻尋味_東方日報

女子歐國盃4強大戰，衞冕嘅英格蘭女足硬撼意大利女足。兩隊喺8強都係驚險晉級，英格蘭靠互射12碼淘汰瑞典女足，不過「女三獅」展現出嘅韌力同戰鬥力，絕對令球員信心更強，而且英格蘭大賽經驗豐富，關鍵時刻穩定性值得信賴，今場熱捧主勝。（HOY TV 76台周三凌晨3時直播）文:工廠仔

英格蘭今屆表現慢熱，第1場波就輸畀法國女足，不過之後愈戰愈勇，先後大炒荷蘭女足同威爾斯女足，上場對住狀態大勇嘅瑞典，亦喺落後2球劣勢下追平，最後射贏12碼晉級，雖然贏得驚險，但就見到球隊士氣同耐戰力驚人，呢支上屆冠軍實力唔使懷疑，踢出信心就更難以抵擋。

意軍超額完成難再突破
意大利女足今屆本來以入淘汰賽為目標，上場絕殺挪威女足，相隔28年再入女子歐國盃4強，已經超額完成任務。意大利今屆表現只可以算係平穩，3場分組賽1勝1和1負，面對強敵西班牙女足即被技術性擊倒，而且球隊一直靠王牌前鋒姬列妮單天保至尊，對住整體實力強勁嘅對手難有勝算。

翻查英格蘭女足近5次對意大利女足，英格蘭拎到4勝1和不敗成績，包括上年熱身賽5比1大勝，當時為英格蘭入波嘅艾娜東妮、胡賓摩兒同蘿倫漢普都仍然在陣，可見雙方實力有一定距離，今場主勝冇甩拖。