女歐國盃：德國火力全開大盤埋丹_東方日報

女子歐國盃C組第2輪賽事，旗開得勝嘅德國女足對住丹麥女足。「日耳曼戰車」上年喺奧運女足拎到銅牌後，信心返晒嚟，一眾新人接棒亦相當順利，中前場人才輩出，火力有保證；0分嘅丹麥女足想出線要盡地一煲，今場唔會死守，開2.5球入球大機會高。（周三凌晨零時開賽）文:工廠仔

德國女足上場2比0輕取波蘭女足，控球率高達75%，早段因為要適應而歎慢板，企穩陣腳後即由舒卓娜同祖莉白蘭特呢對星級進攻組合各入1粒，經過首仗磨練後，相信今場可以更快入局。德國女足近6場入咗26球，火力撻着都幾難擋得住。不過，德國隊長姬莉亞古雲上場重傷緣盡今屆賽事，或令後防出現隱憂，有失波危機。

丹麥盡地一煲焗攻
丹麥女足近年走緊下坡，雖然仍有一定戰鬥力，但對住強隊都係「應輸則輸」，首仗輸畀瑞典女足之後，想出線嘅話今場要盡力搶分，唔會死守坐以待斃。睇番丹麥女足近4次對住德國女足，有3次總入球開3球或以上，今場兩隊都會踢得進取，2.5球入球大值博。