女歐國盃：瑞典冇霸氣入波唔慌多_東方日報

女子歐國盃C組賽事，波蘭女足對瑞典女足，雙方實力有距離，所以「瑞女」客W熱到1.11倍。不過，瑞典女足攻力欠佳，導致近5場有4場總入球開出2球或以下，預料今場小勝居多，博中位數3.5球嘅入球細。（周三凌晨3時開賽）文:Mic少

波蘭續踢穩守突擊
波蘭女足首度打入女子歐國盃決賽周，上仗第一擊遇上曾經8次奪冠嘅傳統勁旅德國女足，即使大部分時間捱打，但上半場都可以保持不失，最終僅小負0比2，已經有交代。

經此一役之後，相信有助提升「波女」球員信心，應該會繼續以穩守突擊戰術同瑞典女足周旋，希望最起碼守和博取1分。

至於瑞典女足過去8屆有6屆最少入4強，其中2屆獲得亞軍，屬於爭標分子，但今屆表現欠缺霸氣，上場僅贏丹麥女足1比0，比賽過程浪費唔少入波機會，球員射門把握力弱，令人不敢恭維，就算實力凌駕波蘭女足，恐怕都無力大炒對手。不過，瑞典女足防守穩陣，近4場僅失1球，屬於守強攻弱球隊，首選入球細。