韓職：江原主場成績最差 全北汽車強勢搶Ｗ_東方日報

連番報捷信心爆棚
今日上演兩場韓職，其中「1哥」全北汽車作客FC江原。全北汽車近期頻頻報捷弗到爆，而且客場特別Sharp醒，造訪主場表現欠佳嘅FC江原，客W實食冇黐牙。

（無綫myTV SUPER周五晚上6時30分直播）文:法達斯維

全北汽車今季重拾勁旅本色，17場聯賽取得10勝5和僅2敗，無論係入波之多（27球）同失波之少（12球），都冠絕聯賽，難怪排緊榜首。連埋其他賽事，全北汽車自從3月中喺亞冠二輸畀FC悉尼後，近15場取得10勝5和不敗佳績，贏到順晒信心爆棚，若果單計客場，近8場更豪取7勝1和添，包括擊敗今季異軍突起嘅大田市民，弗到冇朋友，佢哋依家真係遇神殺神、遇佛殺佛。

江原主場韓職最差
另邊廂，FC江原狀態只屬一般，各項賽事近6場贏得兩場，總共失咗11粒，只有1場冇失波，近兩場更接連輸畀FC安養同浦項制鐵。除此之外，FC江原主場戰績差勁，今季聯賽8次主場出擊，只係得2勝3和3負，入得5粒咁大把，拍住FC首爾，成為其中一支主場成績最差嘅球隊，表現令人失望，面對如狼似虎嘅全北汽車，想唔輸都幾難。