西甲：基羅納未磨合半和簡得過_東方日報

今晚西甲揭幕戰，由基羅納主場硬撼華歷簡奴。「神奇球隊」基羅納接收多名馬體會棄將，變動大磨合需時，華歷簡奴踢法硬淨，近年聯賽碰頭旺半場和，不妨再追。

（Now 633周六凌晨1時直播）文:法達斯維

基羅納前季取得聯賽季軍，令人喜出望外，不過上季經歷聯賽同歐聯雙線作戰，明顯顧此失彼，歐聯出局後下半季仍輸多贏少，最終排第16位。基羅納於今夏轉會市場動作多多，但最具名氣嘅中場韋素與湯馬士林馬，均屬馬體會棄將，而韋素已經30有6，未必幫到手。

另邊廂，華歷簡奴上季於聯賽殺入第8位，獲得歐協聯附加賽參賽資格，呢班波勝在硬淨，上季38場聯賽取得13勝13和12負，13場打和成為其中一支和波第2多球隊。加上佢哋一向穩陣行先，客場更加唔敢輕舉妄動，睇番雙方近6次聯賽對碰，基羅納錄2勝3和1負，只係稍佔上風，其中5次半場打和，可見大家初段都係穩打穩紮，加上季初波未上力，揀半場和好過。

維拉利爾飄忽捱「細」界
夜少少仲有1場，維拉利爾主場迎戰奧維多。有尼高拉斯比比、湯馬士柏迪助陣嘅維拉利爾，雖然之前「拍跳」贏過阿仙奴，但其餘7場熱身賽都不勝，前鋒哥爾尼維特啱啱又過檔華倫西亞，當然升班球隊奧維多實力一般，仲要靠老將辛迪卡索拉支撐大局，造訪「黃色潛艇」必定縮後嚟踢，寧捧2.5球入球細。

（Now 633周六凌晨3時30分直播）