自由盃：16強首回合巴甲內戰佔地利 法林明高體定嚟食_東方日報

聽朝南美自由盃16強首回合，上演巴甲內訌，由法林明高主場迎戰國際體育會。法林明高唔單止喺聯賽排名甩開國體會，近日亦添入多名猛將，挾主場之利必搶先機，讓球盤要讓1球，可謂坐走望贏，照捧上盤。（周四早上8時30分開賽）文:法達斯維

論近況同實力，法林明高肯定秤先，各項賽事近9場贏咗7場，單計主場近8場仲贏咗7場添，證明佢哋主場特醒。事實上，法林明高喺前馬體會左閘菲臘路爾斯執教後，成績穩步上揚，而且靠住佢嘅人脈同名聲，喺轉會市場搵到唔少好嘢，例如佐真路費路、沙奧尼古斯及艾馬臣阿柏里斯度等喺歐洲豪門搵食過嘅球員，實力同經驗進一步提升，難怪今季劍指聯賽同自由盃冠軍。

國體會防守曳難靠
另邊廂，國體會喺聯賽只係位處中游，各項賽事近5場只得1勝2和2負，最弊係佢哋防守唔掂，已經連續6場有失波，唯一優勢係近年同法林明高交手稍佔上風，不過今時唔同往日，況且踢波嘅嘢係逐場計，呢項數據不能作準。加上國體會喺今屆自由盃F組3場作客，僅得1勝1和1負，寧買當頭起，法林明高咁弗捧得過。