日職：接連失利搶分大過天 櫻花開攻半W擦魚腩_東方日報

日職獨腳戲，大阪櫻花主場迎戰新潟天鵝，護級分子新潟天鵝頹勢未止，各項賽事慘吞6連敗，並且都係上半場落後，猶如不設防，球員陷入信心危機。大阪櫻花正好乘虛而入，把握機會搶分，主勝屬穩陣之選，半場主勝亦值博。（無綫82台周一晚6時直播）文:Mic少

雖然大阪櫻花近況都係欠佳，連續兩場聯賽失分之餘，上場天皇盃16強亦不敵FC東京，黯然出局。不過佢哋踢法向來積極進取，近5場聯賽合共攻入11球，包括上輪作客湘南比馬，主動搶攻下取得領先，但踢到89分鐘被判罰12碼，慘遭逼和3比3痛失2分，確實有啲唔抵，今日遇上「冇骨魚腩」新潟天鵝，勢必將一肚冤屈氣發洩喺對手身上，爭取一場漂亮勝仗，逐步改善聯賽排名。

天鵝易帥後成績仲差
至於新潟天鵝嘅情況更為惡劣，今季成績持續低迷長期喺榜尾徘徊，會方6月底忍無可忍，怒炒教練樹森大介，委任入江徹擔任看守主帥，點知表現反而更加差，最離譜係上月天皇盃，竟然以1比2輸畀只屬大學足球隊嘅東洋大學，而且上半場經已落後，可見佢哋班球員無論士氣或信心都蕩然無存，任由對手宰割。

以天鵝各項賽事近6場全敗兼半場落後嘅走勢，恐怕今仗都會再次迅速淪陷，櫻花半場主勝超過2倍，相當抵玩。