蘇哈仔：曼聯追成績不宜一味「買彩票」_星島日報

曼聯買完馬菲奧斯根夏，再高追麥比奧莫，但似乎仲未夠，盛傳想要埋RB萊比錫射手些斯高，預計轉會費為7,500萬歐羅。去季紅魔於英超入44球，買多個前鋒唔會有魔迷反對，但用7,500萬去買張票票，似乎太貴了﹗

近年不少20出頭，或未滿20歲的新星，轉會費動軏半億，7,000至8,000萬歐羅更比比皆是，價錢搶到咁高，係因為呢筆錢部份係買即戰力，部份係買未來潛質，踢得好將來升值才放售。如今大部份豪門的轉會策略都是這樣，但又未必適合每支球隊的情況。

曼聯經過徹底失望的球季後，領隊魯賓艾摩廉已經沒有容錯的空間，今季無論如何都要交出成績，或至少俾人見到球隊正在進步。這樣的前提，當然要買即戰力球員，根夏同麥比奧莫就係此類型，但些斯高只有22歲，在德甲踢了2季，係有一定射術，潛質睇落唔錯，但穩定性唔算太好，而且未踢過大會和英超，買佢就好似買票票咁，都係搏一搏將來，更要用成7,500萬歐羅，值得嗎？

買票票，曼聯本身都有一張，就係海倫，2年前夏天以7,200萬鎊買入。紅魔當年有更多成熟的前鋒選擇，高路梅安尼、域陀奧森漢、哈利卡尼，但最終決定買票票，結果就變到今日咁。見過鬼應該怕黑，之前張票票未兌到，唔應該再花錢買多張，真係有資金不如追奧尼奧堅斯，後者係追成績的不二之選。蘇偉業