熱身賽：美國之旅首站撞正剋星 曼聯有排執難擋錘仔幫_東方日報

曼聯美國之旅展開，首站喺紐約出戰韋斯咸。「紅魔鬼」處於重建期，但今夏增兵並唔順利，最初只簽到馬菲奧斯根夏，出發前先再落實簽入麥比奧莫，主帥魯賓艾摩廉要提升實力仲有排搞；韋斯咸上季聯賽「雙殺」曼聯，近4次對曼聯錄得3勝1負，全面佔優，佢哋今季陣容變化不大，再鬥曼聯贏面高。

（Now 621及640周日早上7時直播）文:邪神

曼聯上季成績直插谷底，最慘係歐霸盃決賽飲恨連歐聯資格都冇埋，結果禍延今夏增兵工作，好多心儀中鋒都唔願意加盟，例如利安戴納改投車路士，約基利斯屬意阿仙奴，會方至今僅簽入3名新兵，唔計小將迪亞高李安，魯賓艾摩廉暫時只簽入馬菲奧斯根夏同麥比奧莫，中鋒位置要焗用把握力弱嘅海倫，陣容升級仲有漫漫長路。

麥比奧莫啱啱到冇默契
出發前喺瑞典舉行嘅熱身賽所見，曼聯僅以0比0賽和新升班嘅列斯聯，反映進攻能力未見改善，根夏更踢到大發脾氣，雖然今場有麥比奧莫候命，但默契欠奉，對提升攻力難有即時幫助，最大問題係球員對勝利渴求嚴重不足，對列斯聯都贏唔到，對實力更強嘅韋斯咸就更難打。

韋斯咸上季成績雖然唔算突出，但往績上剋住曼聯，該隊今季有古達斯離隊，但亦有尼斯借將中堅圖迪保正式加盟，陣容變化不大，只要踢番上季表現，要贏曼聯唔難。