阿甲：萊斯查半和有買趁祖_東方日報

聽朝阿甲次尾場之一，聖馬田聖祖安主場惡鬥萊斯查。聖馬田聖祖安雖然屢戰屢敗，但賠率偏熱有啲異常，萊斯查一向初段先求穩陣，今場唔敢輕敵，半場和不妨追多鋪。（周二早上8時13分開賽）

講到阿甲最差球隊，聖馬田聖祖安敢認第2，冇其他隊敢認第1，連同阿甲首在內，佢哋今季16場聯賽輸咗11場，而且入得5粒咁大把，長期排包尾，真係見到都唔開胃。不過睇睇今場賠率，聖馬田聖祖安嘅主勝得2.31倍，比對手萊斯查嘅3.6倍熱好多，連「讓球主客和」都係佢哋讓波，同咁差嘅近況不成正比，明顯被莊家睇好，但始終唔太相信聖軍，寧願避一避。

防守出色謀定後動
萊斯查戰績好得多，連同阿甲首在內，今季16場聯賽只輸2場，依家位處中游，佢哋最煞食嘅地方係防守，16場聯賽僅失7球，失球之少冠絕群雄。不過重視防守變相令進攻受削，因此萊斯查無論對乜嘢對手，都係穩字行頭，尤其係上半場先求唔輸，謀定而後動，佢哋各項賽事近8場，有6次半場打和，其中5次半場「窿窿」，可見初段非常保守，預計今仗都係照辦煮碗，一於再追半場和。