日皇盃：勝利船開火大出風頭_東方日報

日皇盃第3圈，神戶勝利船作客對甲府風林。神戶勝利船是上季日職及日皇盃「雙料冠軍」，今屆肩負衞冕之責，現時兩條戰線進展順利，聯賽排第2位，早前日皇盃第2圈登場亦以4比1輕取低組別球隊高知聯，進攻火力十足，近10場8次開3球或以上；今場對戰日乙甲府風林，預期又有大手交易，2.5球入球大好路。（周三晚6時開賽）文:邪神

風林豁出去鬥攻
神戶勝利船季初一度陷入低潮，佢哋先輸日超盃，日職要戰至第5輪先至贏波，亞冠精英盃亦喺16強出局，幸好主帥吉田孝行仍然獲得會方信任，近期終於重上勝軌，近7場錄得6勝1和，包括上仗日職主場4比0大炒湘南比馬；雖然宮代大聖要踢東亞錦應趕唔切上陣，但其前鋒拍檔佐佐木大樹上仗交出1入球1助攻，進攻着晒火，今仗強勢出戰日皇盃第3圈，肯定繼續搶攻。

甲府風林並非一般日乙球隊，2022年日皇盃就以日乙球隊身份殺入決賽，並擊敗勁旅廣島三箭爆冷捧盃。有此前科，就算遇上日職班霸神戶勝利船亦無所畏懼，風林喺第2圈順利擊敗福井聯晉級，早前在聯賽作客FC今治又以4比2取勝，今仗淘汰賽場合更加唔會縮，雙方駁火之下入球大機會高唱入雲。