瑞典超：不斷升呢專恰天狼星 米贊比搶Ｗ食住上_東方日報

周二凌晨瑞典超有場獨腳戲，由天狼星主場迎戰米贊比。米贊比係今季瑞典表現最好球隊，全季只係輸過1場，表現非常穩定，有機會首嘗瑞典超冠軍滋味，趁依家氣勢最強肯定盡力搶分；天狼星近況麻麻，擋唔住氣勢逼人嘅米贊比，加上近年對壘米贊比頻頻贏波，今場可以放心捧客W。（周二凌晨1時開賽）文:工廠仔

主隊近6場輸4次
米贊比近年進步神速，由前季排第10位，到上季殺上第5位，今輪賽事前更排喺榜首位置，有望挑戰聯賽冠軍寶座，球員信心同士氣都處於高峰。米贊比上場作客1比0贏奧斯達，近7場聯賽錄得5勝2和，對上4場聯賽作客亦取得3勝1和佳績，今場作客天狼星冇有怕。

天狼星長年都係喺中下游徘徊，今季亦唔例外，上場1比3輸畀哥登堡後，已經逐步捲入降班漩渦，最慘係佢哋表現並無起色，近6場聯賽輸咗4場。再者，天狼星近年對住米贊比都冇運行，過去7次正面交鋒，米贊比有6勝1和不敗戰績，「格食格」味道極濃，今場必定直取客W。