東亞錦：派C弟上陣吸取經驗 輪換鬥國足 日本至駕細_東方日報

今晚東亞錦爆發大戰，由日本硬撼中國。本身只屬C隊嘅「藍武士」，雖然首輪大勝，但有指今場會進行大輪換，實力再打折扣，中國亦有自知之明，刻意死守避免大敗，寧捧3.5球細盤。

（港台電視32周六晚6時24分直播）文:法達斯維

日本今次只派出C隊，仲要係全土炮，連38歲老將長友佑都都有份，儘管首輪大勝港隊6比1，再望望個陣容，26人大軍當中，有23人為國披甲次數都未達雙位數，例如上場食出「大四喜」嘅謝明良，亦只係佢大國腳處子戰，可見實力未算好強。

留力對南韓「打老虎」
主帥森保一指考慮到天氣炎熱下，球員體能消耗大，相信會作出大輪換，「一哥」亦希望大軍全部球員，都有機會喺東亞錦上陣，令佢哋累積經驗，加上嚟緊對南韓先係重中之重，今場隨時點到即止。

另邊廂，國足首輪淨吞東道主南韓3蛋，查實已經輸得少，成場波被「太極虎」控制大局，只因佢哋遙遙領先收夠籌，國足先至避免大敗。國足暫時由久爾傑維奇執教，始終集訓時間太短，好難灌輸太多新戰術理念，況且佢哋本身攻力極度疲弱，近5場4度落敗兼只入1球，全開3球或以下，預計會繼續打守勢波，輸少當贏。提提大家，唔好畀之前世盃外日本兩度大勝國足影響到，因為嗰隊日本係A隊，捧3.5球入球細好過。