美職聯：邁亞密半大起革命_東方日報

老將孭飛搶攻硬道理
聽朝美職焦點戰，新英倫革命主場硬撼國際邁亞密。向來有前冇後嘅國際邁亞密，不嬲喺聯賽一開波即搶攻，造訪狀態欠佳嘅新英倫革命，勢必先發制人，捧1.5球半場大更上算。（周四早上7時30分開賽）文:法達斯維

國際邁亞密早前以東道主身份出戰世冠盃，成功突破分組賽，去到16強先畀巴黎聖日耳門淘汰，始終佢哋老將偏多，能夠有此成績已經有晒交代。事實上，國際邁亞密坐擁美斯、蘇亞雷斯等球星，攻力強勁；單計聯賽，佢哋已攻入40粒，但就失咗28球，明顯太過重攻輕守。而且國際邁亞密唔理三七廿一，總之比賽初段就發動搶攻，無論先入波定先失波，近9場聯賽有7次半場開2球或以上。

新英倫防線連場失波
另邊廂，新英倫革命狀態差強人意，近4場只得1和3負，若果單計近4次主場，同樣3度落敗，場場有失波之餘，亦有3次半場已經落後，初段防守難予人信心。雙方近4次碰頭，國際邁亞密取得3勝1負，包括上次交手狂數6比2，而且全部喺半場開2球或以上，可見每次相遇都喺初段多波入，今場一於博半場大。