美聯盃：對賽剋住聖荷西地震 FC奧斯汀受讓值捧_東方日報

美聯盃8強，聖荷西地震對FC奧斯汀。聖荷西地震近期經常和波，淨係近4場已經打和3次，FC奧斯汀近況唔錯，近3戰2勝1負，加上佢哋近6次鬥聖荷西地震，獲1勝5和不敗戰績，今場受必捧讓球客勝。（周三早上10時30分開賽）文:渡邊年

兩軍現時喺美職排名相若，聖荷西地震排15，FC奧斯汀少踢一場落後2分排20，雙方實力唔相差得幾遠。聖荷西地震近排好旺和波，自5月中開始，踢咗10場法定時間2勝7和1負，包括上輪美聯盃，同波特蘭伐木者90分鐘互交白卷，加時先小勝1比0。地震攻力係西岸第2強，可惜防守唔掂，經常入埋唔夠後邊輸，陷入「和波怪圈」。

明尼蘇達大戰芝加哥
FC奧斯汀啱啱同聖荷西地震相反，如果只計聯賽入球，佢哋係聯賽30支球隊入面最差，但好彩防守不俗，而且佢哋喺美聯盃發揮唔錯，先後以3比2反勝厄爾巴索火車頭及以3比1擊敗侯斯頓戴拿模，似乎想喺美聯盃闖出一片天。今場對手更加係FC奧斯汀樂於面對，因為近6次交手，奧斯汀獲1勝5和，今場好大機會法定時打和，讓球客勝好路。

至於另一場8強賽事，明尼蘇達聯對芝加哥火焰。雙方踢法都娛樂性十足，入得又失得，明尼蘇達聯近5場4次開4球或以上，芝加哥火焰曾以7比1大炒華盛頓聯隊，加上兩軍交手經常開入球騷，今場宜向入球大埋手。（周三早上8時開賽）