女歐國盃：首輪派5蛋顯霸氣 女狂牛繼續大勝比你睇_東方日報

女子歐國盃B組賽事，捧盃大熱西班牙女足喺首仗已盡顯霸氣，輕輕鬆鬆就5比0大炒葡萄牙女足，今場對住實力又係低兩班嘅比利時女足，3分基本上實食冇黐牙，係睇佢哋會贏幾多。「女狂牛」近期殺得性起頻頻大炒，今場相信唔會留手，4/4.5球入球大抵玩。（HOY TV 76台周二凌晨零時直播）文:工廠仔

西班牙女足係應屆女子世盃冠軍，不過喺女子歐國盃就連決賽都未入過，今屆決心創造歷史，首仗對葡萄牙女足已見到無比決心，上半場一輪急攻就領先4球，最終大炒5比0。西班牙女足最近6場比賽狂入26球，當中有4場總入球開5球或以上，比利時女足今場凶多吉少。

板櫈夠深保持戰力
西班牙女足人才鼎盛，前鋒艾巴莉當杜上場有傷已經冇出，「金球小姐」邦瑪迪病愈亦只係後備踢咗陣，一眾球員為保住自己個正選位置，落到場肯定會搏晒命去表現自己，西班牙女足亦有龐大兵源去換人，喺全場維持高戰鬥力，相信可以由頭攻到尾。

比利時女足上輪輸畀意大利女足，出線機會變得渺茫，近9場比賽6次輸波，當中包括女子歐國聯兩戰西班牙女足，佢哋兩場分別輸2比3同1比5，近4次對西班牙女足交鋒，有3次總入球開5球或以上，今場梗係再追4/4.5球入球大啦！