東亞錦：南韓恃地利半W搶胡_東方日報

東亞錦今晚於南韓龍仁市開打，揭幕戰已經有好戲上演，由主辦國南韓火併中國。雖然「太極虎」未有徵召外流歐洲球員，但一眾土炮更要把握機會爭取表現，博搭上明年世盃尾班車，況且國足「恐韓症」未愈，經常早早落後，今場隨時半場都頂唔住，半場主勝有計。（港台電視32周一晚7時直播）文:法達斯維

南韓早前已取得下年世盃入場券，主帥洪明甫今次賽事未有召入如隊長孫興民及李康仁等人，用意相當明顯，因為呢班喺歐洲搵食嘅球星唔使再試，反而想借東亞錦考察一班土炮嘅能力，為未來鋪路。除咗金太炫等首次入選嘅新人外，另一焦點係喺日職搵食嘅羅相浩獲得重召，呢班「邊緣人」實力當然唔及「孫仔」等大師兄，但論拚勁絕對唔輸蝕，必定珍惜機會表現自己，爭取入選下年世盃大軍名單。

國足「恐韓症」未醫好
相反，國足再次無緣世盃決賽周，隨即搵來久爾傑維奇頂住檔執教，不過呢位塞爾維亞主帥得區區6堂「速成訓練課」，你期望佢能夠帶來幾大改變呢？而且球隊賽前再傳噩耗，後衞吳少聰因傷極大機會退隊，張玉寧、蔣聖龍及汪士欽等都係帶傷入選，就算趕及復出，狀態亦難有保證。何況國足一向患有「恐韓症」，雙方近5次碰頭，南韓贏晒之餘，有4次上半場已經領先，加上主場出擊及球迷聲勢，勢必一開波就「搶錢咁搶」，半場主勝捧得過。