女歐國盃：贏埋今場確保出線 挪威半W速破芬蘭_東方日報

今晚女子歐國盃A組次輪頭場，挪威女足硬撼芬蘭女足。挪威女足首輪憑頑強後勁反勝，盡顯韌力，而且對親芬蘭女足例搶韁，今場勢必先發制人，一於捧半場主勝。（HOY TV 76台周一凌晨零時直播）文:法達斯維

挪威女足首輪於上半場落後1球劣勢下，易邊後憑住希嘉寶建功，以及對方擺烏龍，最終以2比1反勝主辦國瑞士女足，有驚無險打響頭炮，韌力十足，如果唔係希嘉寶之後操刀12碼宴客，應該贏得更多。雖然如此，但呢位里昂女足前鋒總係於關鍵時刻挺身而出，今場仍要靠佢數胡。

芬蘭女足未踢先怯
芬蘭女足首輪同樣贏波，以1比0險勝冰島女足，不過佢哋係趁住對手打少個之下，於中後段入波奠勝，喺11個打11個嗰陣其實都均勢，因此贏得有啲僥倖，難與挪威女足首輪反勝相提並論。況且本身兩軍實力都有一定距離，挪威女足爛船都仲有三斤釘，睇番近5次碰頭，「維京女」全部上半場已經取得領先優勢，並且贏咗其中4場，芬蘭女足真係未踢先怯，隨時半場都頂唔住，半場主勝有計，加上「維京女」今場再贏就肯定出線，主勝亦可兼投。