美洲金盃：王者周一揭盅 美國墨西哥強細爭霸_東方日報

美洲金盃上演「夢幻決賽」，美國主場迎戰衞冕嘅墨西哥，呢兩支老對手實力及狀態都非常接近，加上來到終極一戰，雙方應該會額外謹慎，避免犯錯功虧一簣，預料戰局會陷入膠着，甚至以1球定勝負。參考兩隊近7次對賽有6次總入球開2球或以下，首選中位數2.5球嘅入球細。（無綫myTV SUPER周一早上7時直播）文:Mic少

美國、墨西哥及加拿大將於明年合辦世盃決賽周，美、墨兩國都渴望先捧美洲金盃振聲威。由前車路士領隊普捷天奴執教嘅美國今屆5戰法定時間取得4勝1和，但美國並非以最強人腳參賽，祖雲達斯中場韋斯頓麥堅尼、AC米蘭翼鋒基斯甸普列錫、摩納哥射手科拿連巴洛根等多位「歐洲兵」冇入選，整體實力難免打折扣。

因此，美國晉級過程表現一般，其中8強要靠互射12碼，驚險地淘汰哥斯達黎加，上仗4強亦都係僅贏危地馬拉2比1，今場遇上宿敵墨西哥，更加難佔優勢。

悶蛋戰術最緊要穩陣
至於上屆冠軍墨西哥連續3屆打入決賽，其中2次捧盃都係小勝1比0，雖然隊內擁有AC米蘭射手辛迪亞高基文尼斯，但領隊艾古爾採取穩陣戰術，今屆除咗首場贏多明尼加共和國3比2之外，近4場都保持不失球，總入球全開2球或以下，包括上場4強贏洪都拉斯1比0。墨西哥應該會貫徹決賽踢「悶蛋足球」風格，預料入波都係1球上落，捧細盤啱數。