女歐國盃：德女捲土重來做大事_東方日報

女子歐國盃C組，入決賽及奪冠次數最多嘅德國女足，將會撲擊首度參賽嘅波蘭女足。德國女足人強馬壯，除咗有力輕鬆開出開門紅，更有機會大勝一場，不過波蘭女足有「女版羅拔仔」伊華柏祖，呢名西甲神射手亦有機會攻破德國大門，3.5球大入球大玩得過。

（HOY TV 76台周六凌晨3時直播）文:渡邊年

德國女足9次入決賽8次奪冠，唯一一次亞軍就係上屆輸畀英格蘭女足，今屆捲土重來，肯定以冠軍為目標。「日耳曼女足」陣中不少進攻好手，效力拜仁女足嘅舒卓娜弗到漏油，近6場攻入5球，而且佢喺舊年歐國盃外圍賽2次對波蘭都有波入，助德國主場先大勝4比1，作客亦贏3比1，今場有機會再度數胡。

波蘭「女羅拔」有料到
波蘭雖然首次殺入決賽周，但陣中球星伊華柏祖絕對不能忽視。伊華柏祖2015年至2024年效力禾夫斯堡，上陣121場射入96球，更於2022/23年球季成為女子歐聯神射手，上季佢轉投巴塞隆拿，即刻成為西甲神射手，有機會喺德國女足身上取得入球。

事實上，波蘭女足近10場正式賽事保持不敗，陣中亦有不少球員效力女子德甲球會，有知己知彼作用。今場預料德國女足會採取主動，波蘭亦有機會破門，加上德國女足近5場全開4球或以上，入球大係最佳投注選擇。