女歐國盃：巴塞做骨幹霸氣十足 女狂牛撞葡女大開殺戒_東方日報

女子歐國盃B組賽事，西班牙女足同葡萄牙女足上演「雙牙大戰」。「女狂牛」雖然從未打入過決賽，不過論球員質素絕對冠絕全歐洲，貴為上屆女子世盃冠軍得主，再被捧為奪標熱門係理所當然。西班牙女足實力有保證，加上近兩次對賽都能輕取葡軍，今場首戰為響頭炮勢必大開殺戒，3.5球入球大值得支持。

（HOY TV 76台周五凌晨3時直播）文:工廠仔

西班牙女子足球近年威盡球壇，巴塞隆拿女足喺近3屆女子歐聯錄得2冠1亞佳績，以巴塞女足為骨幹嘅國家隊同樣霸氣十足，兩年前世盃首度封后，氣勢一時無兩。西班牙女足人才鼎盛，包括兩位兩屆金球獎得主邦瑪迪及佩泰娜絲在陣，亦有效力歐聯冠軍阿仙奴女足嘅卡丹堤，絕對星光熠熠。

西班牙近兩次對賽均大勝
西班牙女足球員合作多年，差唔多半隊都踢巴塞女足，默契一流，「女狂牛」亦貫徹巴塞女足嘅狂攻風格，近5場賽事總共取得21個入球，當中4場總入球開4球或以上，包括上星期最後一場熱身賽3比1擊敗日本女足，證明球隊處於良好狀態，相信可以即刻撻着。

葡萄牙女足仲係處於發展階段，今年女子歐國聯面對一線強隊接連慘敗，包括喺4月兩戰西班牙女足，分別輸2比4同1比7，今次交鋒「雙牙」實力有明顯差距，決心首次捧盃嘅西班牙女足有望大開殺戒，開3.5球入球大冇難度。