女歐國盃：挪威搶頭炮誓挫瑞士_東方日報

第14屆女子歐國盃決賽周今晚開打，尾場A組首輪有東道主瑞士登場，迎戰挪威女足。瑞士女足本身實力已經麻麻，仲有王牌拉蒙娜巴克雯因傷落選，弱上加弱，而且挪威女足專剋「女十字軍」，今場可旗開得勝，客勝有計。（HOY TV 76台周四凌晨3時直播）文:法達斯維

瑞士女足作為主辦國，梗係想藉地利爭取佳績，點知臨開幕前卻收到壞消息，王牌拉蒙娜巴克雯喺賽前集訓時受重傷，今屆賽事肯定冇佢份，要知道呢位前鋒為國153次披甲轟60粒，冇咗佢打擊甚大。事實上，「女十字軍」各項賽事近8場贏得1場，仲要係日前同捷克女足「拍跳」，無論係實力、狀態都唔多掂，相信會有自知之明，將搶分目標放喺之後兩場對冰島女足及芬蘭女足，今場鬥挪威女足只求輸少當贏。

近兩次對賽贏晒
另邊廂，挪威女足近年確實呈現下滑迹象，不過爛船都有三斤釘，難得身處實力偏弱嘅A組，應可一洗之前兩屆女子歐國盃均在分組賽行人止步嘅恥辱。挪威女足陣中有曼聯3寶施蓮比錫、伊莉莎白達蘭特及莉莎拿亞辛特，同埋巴塞射手卡露蓮漢臣擔大旗，不容忽視。翻查紀錄，雙方近4次交手，挪威女足贏3次，就算「女維京人」近6場僅2捷，但兩場勝仗咁啱得咁蹺都係贏瑞士女足，擺明格食格，今場有力打響頭炮。