女韓職：乘近期勇態搶分 華川女足客Ｗ首到拿來_東方日報

女子韓職快車，榜首嘅華川FC女足作客聯賽錦標主要對手首爾城女足。首爾城女足陷入「不勝魔咒」，近7場有6場不勝，相反華川FC女足近5場作客獲4勝1和，加上近年對賽都剋住對手，今仗有望反客為主，推介客勝。

（周四晚6時開賽）文:臻贏特

由於南韓女子國家隊，7月中開始要出戰東亞盃，同中國、日本及中華台北爭冠，嚟緊近1個月女子韓職都冇賽事，榜首嘅華川FC女足為免之後打窒道氣，畀隨後球隊追到，今場肯定全力搶3分，盡量拉開距離。

今場華川FC女足對手，正正係爭標分子之一首爾城女足，但對華川FC女足嚟講，今場係對住首爾城嘅最好時候，因為首爾城近排唔識贏波。上場首爾城對下游嘅水原FC女足，領先一球之下都被追和，近7戰只得1勝6和，陷入奇怪嘅「不勝魔咒」，加上華川FC女足近5場作客獲4勝1和，而且佢哋近5次對首爾城女足獲3勝2和，集有利條件於一身，客勝值得留意。

聞慶尚武細鍊世宗FC
至於另一場聞慶尚武女足主場對世宗FC女足，聞慶尚武女足狀態持續低迷，近6場未贏過，淨計近5次主場，亦只係入過兩球，即使主場出擊，預料都會以防守為主，世宗FC女足作客亦踢得保守，聯賽10場作客9次開2球或以下，包括近6場作客全開入球細，2.5球入球細要捧場。