U21歐國盃：英格蘭周身刀大起橙軍_東方日報

U21歐國盃4強大戰，英格蘭U21火併荷蘭U21，肩負衞冕重任嘅英格蘭U21今屆水準比較飄忽，防線亦唔及以往穩陣，導致4戰僅2勝1和1負，其中3場總入球開出3球或以上，加上荷蘭U21傳統上亦攻強守弱，首選中位數2.5球嘅入球大。

（周四凌晨零時開賽）文:Mic少

英格蘭U21上屆以6戰全勝兼不失球嘅完美姿態奪冠，但今屆成績明顯比較遜色，僅以小組次名出線8強淘汰賽，期間以1比2不敵德國U21。不過，「幼獅兵團」始終有多位效力英超勁旅嘅球員助陣，包括利物浦中場哈維艾利洛、曼城中場占士麥艾迪等猛將，上場8強以3比1擊敗另1支爭標熱門西班牙U21，盡顯霸氣，哈維艾利洛又射入1球，今屆已有2球進帳。

值得一提，英格蘭今屆7個入波之中，分別由6位球員射入，可見球隊周身刀、張張利，攻力有保證。不過，「幼獅」防守並唔算穩陣，4戰僅1場不失球，遇上擅長進攻嘅「橙衣兵團」，未必可以保持清白之身。

荷蘭回勇無懼駁火
至於荷蘭U21首2場對芬蘭及丹麥，同樣失2球，幾乎無法出線，幸好狀態及時回勇，最後1場分組賽擊敗烏克蘭，驚險晉級淘汰賽，上場8強贏葡萄牙，4戰都有波入，「橙衣兵團」已經重拾信心及士氣，當然要乘勝追擊，力爭打入決賽，無懼同英格蘭U21駁火，隨時合演入球騷。