世冠盃：邁亞密恭迎波圖 鬥攻演入球騷_東方日報

世冠盃A組次輪賽事，東道主國際邁亞密火併波圖。國際邁亞密首輪唔輸有啲運仔，以美斯為首嘅鋒線必火力全開；波圖為求出線亦唔會縮，鬥攻格局捧2.5球入球大。

（周五凌晨3時開賽）文:法達斯維

美職勁旅國際邁亞密上場有啲令人失望，全場畀埃及球隊艾阿里撳住嚟砌，靠門將烏斯達利勇救12碼，守和對手0比0，叫住保住1分。當然美斯、蘇亞雷斯及布斯基斯質素唔使懷疑，進攻有保證，只係拳怕少壯，呢班「老鬼」未必全場都保持到高水準，若然受壓失波唔奇。

4隊同分贏到好着數
另邊廂，波圖近年喺葡超畀士砵亭同賓菲加搶晒風頭，佢哋首輪只係同彭美拉斯互交白卷，實力確係今非昔比，同老將偏多嘅邁亞密對比可謂半斤八両。從好嘅角度去諗，由於依家A組4隊同分兼同得失球，即係話出線機會均等，預計今輪都會豁出去搶3分，到時就有主動權。國際邁亞密近10場入24球失23粒，9次開3球或以上，捧入球大最上算。