美洲金盃：狀態大勇往績佔優 牙買加主Ｗ拉唔住_東方日報

明早繼續有美洲金盃，輪到C組球隊登場，牙買加對危地馬拉值得留意。上屆4強分子牙買加有「小英格蘭」之稱，領隊係前英格蘭國家隊主帥麥卡倫，陣中多位球員喺英國搵食，實力有保證，加上狀態當勇，近5場比賽取得4勝1和，包括早前喺世盃外圍賽大炒危地馬拉3蛋，相信牙買加可以再挫對手，首選主勝。（周二早上10時開賽）文:Mic少

牙買加曾經屬於英國殖民地，有唔少球員前往英格蘭搵食，包括阿士東維拉翼鋒里安拜尼、賓福特後衞賓諾克更加喺英國出世。麥卡倫上年夏天接掌帥印後，積極拉攏有牙買加血統嘅前曼聯翼鋒格連活特「轉會」代表牙買加，雖然呢位球星今屆冇份參賽，但以牙買加現有人腳，相信分組賽可以輕鬆出線。尤其是剛於上周三世盃外以3比0大勝危地馬拉，反映雙方實力有好大距離，唔夠一星期又交鋒，牙買加可望再次輕取對手。

瓜德羅普受讓可取
至於危地馬拉一向係陪跑分子，過去10次參賽有7次分組賽出局，上屆打入8強，就係被牙買加淘汰。雙方近9次對賽，危地馬拉輸7次，恐怕今仗難逃再敗厄運。

同組另1場，巴拿馬對瓜德羅普，瓜德羅普各項賽事近5場不敗，包括近4場全勝，而且全部保持不失，今場有得受讓，不妨博較有分頭嘅讓球客勝（+1）。（周二早上7時開賽）