世冠盃：疲兵鬥奧克蘭捧入球細_東方日報

拜仁慕尼黑未能簽入科利安華迪斯，惟有另覓人選，據西班牙傳媒爆料，呢支德甲冠軍計劃以3,500萬歐元（約3.2億港元）收購皇家蘇斯達中場久保建英，如果成交，佢將會成為史上最高身價日本球員。

現年24歲嘅久保建英3年前結束「人球」生涯，正式離開皇馬，加盟皇家蘇斯達後，一直穩坐正選，包括今季上陣52場入7球及4次助攻，曾經傳出利物浦有意簽佢，但最後改為收購利華古遜天才中場科利安華迪斯。由於拜仁爭奪華迪斯失敗，加上利萊辛尼及湯馬士梅拿離隊，急需補充中場人腳，久保建英技術全面，可以勝任進攻中場及翼鋒，符合拜仁增兵要求。

疲兵鬥奧克蘭捧入球細
另外，拜仁慕尼黑將於世冠盃C組，出戰新西蘭球隊奧克蘭，雙方實力距離懸殊，但考慮到拜仁剛經歷漫長球季，球員身心俱疲，射手哈利卡尼等多位主力早前出戰國際賽，飽受舟車勞頓之苦，未必及時恢復十足狀態，預計難以大勝奧克蘭。翻查紀錄，拜仁慕尼黑近9場有8次總入球開4球或以下，今場寧願博中位數4.5球嘅入球細。（周一凌晨零時開賽）