Ｕ21歐國盃：鬥牛有「孖寶」首名走唔甩_東方日報

西班牙U21曾經5度奪冠，上屆亦能殺入決賽獲亞軍，加上佢哋一向人才輩出，包括有「巴塞孖寶」謝拉特馬田及柏保路托尼助陣，實力超班，首名出線走唔甩。其餘3隊實力相若，意大利U21係名氣大經驗豐富，不過近況非常一般。斯洛伐克U21雖然係東道主，但唔使踢外圍賽實力未明，雖然羅馬尼亞喺外圍賽戰績唔錯，但實力仍與意大利有距離，次名難與意軍爭逐。

英德冤家聚頭打餐飽
英格蘭U21與德國U21真係冤家路窄，連續兩屆分組賽同組，「光頭佬」卡斯利麾下嘅英格蘭U21作為上屆盟主，有昆沙、哈維艾利洛及尼華尼利等英超兵擔大旗，連同祖迪比寧咸細佬祖比比寧咸，實力強勁。德國U21經歷上屆分組賽出局嘅屈辱，今屆誓要一雪前恥，雖然未夠班同英格蘭U21爭首名，但實力點都喺捷克U21及斯洛文尼亞U21之上，可同英軍攜手出線。

法國雙星攻堅出線大熱
法國U21前線有熱刺雙星威爾遜奧度拔及馬菲斯泰爾攻堅，後場亦有RB萊比錫中堅卡斯迪路盧基巴鎮守，牌面上明顯秤先好多。

雖然有嘅卓基等畀大國腳徵召，實力略為受削，不過無阻佢哋首名晉級，因為葡萄牙U21亦有外圍賽攻入8球嘅射手法比奧施華落選，進攻打折扣，難與法國U21相提並論，好彩波蘭U21及格魯吉亞U21更不濟，應可獲次名。

荷蘭火力猛穩做小組一哥
由前國腳利斯加執教嘅荷蘭U21，除咗有阿士東維拉後衞伊恩馬臣領銜外，亦有將門之後──魯賓雲邦美於前線數胡，難怪佢哋喺外圍賽10仗轟32粒，火力數一數二，首名冇難度。

另外，丹麥U21召入曼聯超新星奧比馬田，配合最擅長嘅整體戰，絕對無懼以土炮為主嘅烏克蘭U21，有力爭取次名出線，而芬蘭U21實力及經驗不足，都係陪太子讀書。