日皇盃：日乙1哥勁慢熱市原半和有素返_東方日報

今日日皇盃第2圈上演日乙內訌，由千葉市原迎戰熊本羅亞素。雖然市原位居乙組榜首，但近況明顯跌Watt，初段尤其慢熱，半場未必咬得入羅亞素，半場和捧得過。

（周三晚6時開賽）文:法達斯維

市原喺日乙18場贏咗11場排緊第1，領先下游嘅羅亞素20分之多，睇落真係強弱懸殊。不過波係圓嘅，特別係市原近況大跌Watt，近7場僅得1勝4和2負，見到都得人驚。而且佢哋明顯只係識踢順風波，如果遇到逆境就多數失分，就以近7仗為例，除咗贏FC今治嗰場外，冇一場先入波，因此嗰6場全部贏唔到，同時呢7仗全開半場和，反映出市原入局慢，搞到愈踢愈急躁，愈急躁愈入唔到波，最終導致失分。

砂岩鬥愛媛直取和波
當然羅亞素都唔係好嘢，依家喺乙組排緊第16位，單計近7仗就輸咗5場。但要留意，羅亞素每逢對住市葉都有啲計，近8次正面交鋒，羅亞素只係輸過2次咁大把，有7次開半場和，其中6次半場開「窿窿」，可見佢哋初段頂得兩嘴，既然市原例慢熱，半場和值得追多鋪。

另一場日乙內鬥，鳥棲砂岩硬撼FC愛媛，砂岩主場成日和波，近6場主場和咗4場，愛媛更加係聯賽和波王，18場和咗9場，單計作客更加5連和，不妨直取和波。