外圍賽：澳洲拖字訣細味沙特_東方日報

最後一輪唔大敗即出線
世界盃外圍賽亞洲區第3圈C組最後1輪，沙特阿拉伯主場生死戰對澳洲。排第3嘅沙特落後排第2嘅澳洲3分，兩隊得失球差距巨大，澳洲比沙特多8球，沙特要取得直接出線席位，必須淨勝澳洲5球或以上，先唔講澳洲唔會企喺度任你攻，何況進攻並非沙特強項，近7場世盃外全開2球或以下，澳洲只要做好本分，2.5球入球細高唱入雲。（港台電視32周三凌晨2時15分直播）文:邪神

沙特現時落後澳洲3分，今場正面對決只要贏波就可追到同分，不過澳洲得失球係得14球失6球，得失球+8，而沙特得6球失6球，沙特要超越澳洲，就要贏澳洲5球或以上，翻查沙特近年數據，佢哋上次淨勝5球，已經係4年前嘅上屆世界盃外圍賽贏巴勒斯坦5比0，想奇迹出線就要創4年來最大勝仗先得，難度可想而知。

沙特土炮質素麻麻
沙特近年大灑金錢搞職業聯賽，邀請國際巨星空降提高叫座，又成功申辦2034年世界盃決賽周，照計國家隊唔會差，但就因為過度放寛外援限額，壓制本土球員上陣機會，令國家隊戰績不進反退，今場莫講話贏澳洲，唔輸已經唔錯。

至於澳洲上場1比0擊敗日本後企穩小組第2，全隊已經忍唔住同主場球迷狂歡慶祝，事關出線形勢對佢哋非常有利，等同大半隻腳入咗決賽周，「袋鼠兵」今場只要做好防守，採用緊迫踢法或者拖延戰術，沙特勢必難越雷池半步，就算唔小心輸1、2粒，只要唔太離譜都唔影響出線，所以今場入波唔會多，2.5球入球細好路。