外圍賽：出線關鍵戰印尼蓄細待發_東方日報

今晚世界盃外圍賽亞洲區第3圈C組上演生死戰，印尼主場硬撼中國。雙方同樣力爭下圈附加賽資格，印尼主場出擊例保守，國足亦受傷停影響，必定穩陣行先，寧捧2.5球入球細。

（港台電視32周四晚9時45分直播）文:法達斯維

先講講賽制，每組頭兩名直接進身下年世盃決賽周，第3及第4名就獲下圈附加賽資格。C組除日本鎖定首名出線外，另一直接出線席位，相信係澳洲同沙特阿拉伯之爭，至於以9分排第4嘅印尼，雖然數字上仲有機會爭前2，但因為尾輪要鬥日本，搶分機會渺茫，都係專心保前4為妙，而且荷蘭名宿古華特執教後頭2仗只得1勝1負，似乎仲未掌握到隊波特性。睇番印尼近7場世盃外主場出擊，有6次開2球或以下，可見佢哋喺主場分外保守。

中國受傷停影響
另邊廂，中國暫以6分排包尾，得失球亦遠遜印尼，若果今仗全取3分，爭前4仲有一絲希望，相反假如和波，除咗尾輪一定要贏巴林，仲要寄望日本大炒印尼，到時形勢就非常被動。可惜國足問題多多，射手武磊因傷落選，謝文能同林良銘亦要坐波監，攻力嚴重受削，預計先做好防守希望穩中求勝，入球細屬不二之選。