英超：森林車仔盡地一煲駁火騷_東方日報

今晚英超諾定咸森林主場硬撼車路士。第7位嘅森林一定要贏，先有機會殺入前5，主場必定冇保留搶攻，不過「車仔」亦冇乜失分空間，雙方背水一戰駁火難免，睇番「車仔」近4次作客，有3次總入球開3球或以上，博中位數2.5球嘅入球大。（Now 624周日晚11時直播）文:Mic少

主隊遇強有保證
森林原本爭前5充滿優勢，點知季尾急速下滑，近4場聯賽僅1勝2和1負，現時陷於被動，今仗除要全取3分外，仲要望紐卡素或維拉失分，先可以打入前5，別無選擇下惟有放手一搏，贏波先有價講。事實上佢哋遇強愈強，近5次聯賽主場對前6球隊，取得2勝2和1負，包括擊敗曼城，打和利物浦同阿仙奴，前鋒基斯活特今季聯賽已有20球進帳，有力撕破「車仔」防線。

至於「車仔」亦唔可以太老定，輸波隨時第5不保，呢支「億萬大軍」近5場聯賽4勝1負，包括3比1擊敗冠軍利物浦。雖然「車仔」嚟緊周四凌晨要踢歐協聯決賽，但相比下歐聯參賽資格更重要，今場冇得留手，好大機會出現入球騷。