韓職：全北腳風順半場撳濟_東方日報

今日下午韓職賽事，下游球隊濟州SK主場迎戰全北汽車，兩隊級數同實力有大段差距，強弱分明。主隊濟州SK近5場不勝，狀態極差；相反全北汽車喺烏拉圭名將普耶執教下，今季愈踢愈有，攻守表現都非常穩定，今場可以輕鬆拎3分，半場客勝值得支持。

（周五晚6時30分開賽）文:工廠仔

濟州SK主帥有下台壓力
濟州SK目前排喺尾2位置，上場絕地逼和金泉尚武，總算終止4連敗頹勢，但係球隊整體演出仍然唔討好，今季場均入唔到1球波，但係近5仗就失咗11球，真正係「攻不銳、守不穩」。濟州SK早前被球迷圍堵隊巴，教練金鶴范已失去球迷信任，要佢下台聲音日益壯大，主場出戰反而面臨更大壓力，主場3連敗絕對唔出奇。

全北汽車經歷上季失意後，成功聘請烏拉圭名將普耶執教，球隊磨合後已逐步回復勁旅本色，近12場賽事保持不敗，近7場賽事更豪取6勝1和佳績，呢7場比賽佢哋全部率先入波，近5仗有4次喺上半場領先，一眾前鋒腳風極順，有力早段撕破濟州SK防線，半場客勝放心捧場。