澳職：4強首回合開戰 墨城格食格明恰西部聯_東方日報

澳職季後賽4強首回合，西部聯主場迎戰墨爾本城。西部聯喺淘汰圈驚險淘汰阿德萊德聯，不過亦付出代價，後防主將占士當拿治勇戰受傷，今場難以候命，對防線構成極大影響，就算有主場之利亦難樂觀，一於捧客勝。

（無綫82台周五下午5時35分直播）文:工廠仔

西部聯今季常規賽表現唔差，最後只係落後墨爾本城1分排第3位，可見兩隊嘅整體實力其實不相伯仲，不過佢哋每次正面對撼，墨爾本城都技高一籌，近4次交鋒全部都由墨爾本城獲勝，好有「格食格」嘅味道。

傷兵回歸強陣出擊
墨爾本城喺季後賽先輪空，有接近兩個星期時間休息，球員養精蓄銳，加上守將尼達利艾堅遜同前鋒馬菲歷基都養好傷，據報今仗可以復出候命，墨爾本城強陣出擊可以秤先，捧客勝好路。