意甲：穩中求勝只望3分 拿玻里力保優細_東方日報

今季意甲剩番最後3輪，冠軍成拿玻里同國際米蘭之爭，兩隊今晚分途出擊，勢必使出渾身解數。拿玻里目前領先國米3分，今輪主場面對熱拿亞，贏波難度唔高，不過主Ｗ太熱唔抵玩，睇番佢哋近5場聯賽，4次開2球或以下，轉玩2.5球入球細好過。（HOY TV76台周一凌晨2時45分直播）文:渡邊年

拿玻里今季最引以為傲嘅，肯定係佢哋嘅硬淨防守，聯賽35戰只失25球，係歐洲5大聯賽中失波最少。佢哋4連勝兼夾1球不失，單計近9次主場7勝2和，面對熱拿亞可望穩中求勝。事實上拿玻里近5場聯賽即使獲4勝1和，但有4場總入球開2球或以下，熱拿亞3連敗頹到爆，近4場僅入1粒，而且佢哋排13位，球員等放假Mode，首選入球細。

國米客勝冇甩「拖」
至於次席國米早少少登場作客拖連奴。國米啱啱殺入歐聯決賽，士氣高昂，勢必乘勝追擊，加上拿達路馬天尼斯同馬古斯杜林傷愈復出，增添贏波本錢；拖連奴近6場聯賽僅1勝，雙方近5次對賽，國米獲得全勝，一於熱捧客勝。（HOY TV76台周一凌晨零時直播）