英超：主場保守森林蓄細搶前５_東方日報

今晚英超獨腳戲，諾定咸森林主場迎戰賓福特。森林剛於英足盃出局，搶聯賽前5嘅歐聯席位變得更重要，佢哋主場出擊例牌保守，遇上實而不華嘅賓福特，唔敢輕舉妄動，寧捧2.5球細盤。（Now 621周五凌晨2時30分直播）

森林啱啱喺英足盃4強淨吞曼城兩蛋，無緣闖入決賽，依家惟有疊埋心水，全力爭入前5出席下屆歐聯。雖然佢哋近期有跌Watt迹像，但大部分失分都係作客賽事，主場仍有保證，今季16輪主場獲9勝兼僅失11球，係今季聯賽主場失波最少球隊，強如利物浦及阿仙奴嚟到都要失分，計埋各項賽事，佢哋近5場主場法定時間全開2球或以下，加上剛同曼城激戰完體力輸蝕，必先鞏固防守望穩中求勝。

賓福特作客極硬淨
另邊廂，賓福特狀態亦唔錯，單計作客近8場錄5勝2和僅1敗，硬淨到暈，而且近年對住森林不落下風，近5次交手只輸過1次，佢哋快速反擊打法尤其煞食，難免令森林有所顧忌。今晚勢均力敵，勝負難料，以森林喺主場偏重保守嘅風格，預計今仗會比較拉鋸，唔慌多波入。