英冠：列斯聯「保帥」半場破城_東方日報

列斯聯近4場贏晒，走勢相當對辦。

周二凌晨英冠獨腳戲，列斯聯主場對布里斯托城，列斯聯上仗贏波後，已提早鎖定前2位直接升班資格，但卻爆出領隊丹尼爾法基面臨被炒，球員為支持呢位48歲德國名帥，勢必搏盡踢漂亮勝仗，幫助佢保住帥位，追半場主勝。（無綫myTV SUPER周二凌晨3時直播）文:Mic少

雖然丹尼爾法基執教列斯聯兩年就帶隊升班，但英國傳媒指作為班主嘅美國財團並唔信任法基，事關法基曾兩次率領諾域治升上英超，都慘淡收場，為免「黑歷史」重演，管理層打算來季改搵西班牙名宿法比加斯執教。不過法基深受球員支持，眾將剩番兩場聯賽都會落力求勝，贏埋英冠冠軍，希望管理層改變主意，憑列斯聯近4場聯賽全勝兼半場「開W」氣勢，要領先上半場話咁易。

布里斯托城近7對賽未威過
至於布里斯托城仍然要搶分力保前6位升班附加賽資格，但球隊狀態麻麻，近4場作客未贏過，加上過去7次對列斯聯，只有1和6負，明顯被對手食住，恐怕今仗難破宿命，列斯聯半場主勝值得再追。