英足盃：最後捧盃希望曼城剷平森林_東方日報

英足盃4強重頭戲，諾定咸森林喺溫布萊中立場火併曼城。森林今季異軍突起，聯賽長期佔據前列位置，現距離隊史35年來首項重要錦標只差2場，勢必搏盡；「藍月亮」今季戰績下滑，幸好近期及時修正，英足盃成為佢哋今季最後希望，對上兩屆英足盃均打入決賽，最終獲1冠1亞，大賽經驗穩壓森林，客勝看高一線。（Now 651周日晚11時30分直播）文:邪神

森林對上一項重要錦標已經係1989/90年度嘅英聯盃冠軍，漫長歲月過後，今季森林銳意重拾光輝，爭奪聯賽前5名重返歐聯可謂重中之重，至於英足盃能夠殺入最後4強，多少帶點幸運成分。森林喺第3及第4圈對手只係低組別球隊，第5圈對剛宣布降班嘅葉士域治，上圈先遇到較難應付嘅白禮頓，即使抽籤有利，森林對上3場英足盃都只係憑互射12碼晉級，過程相當「符碌」。

曼城雖無復當年勇，但係「爛船都有三斤釘」，特別係奇雲迪布尼近期重回正軌。再睇曼城今屆英足盃4戰全勝，今場有力乘勢再取勝仗，有望喺90分鐘內擊退森林，連續3屆殺入決賽。

哥帥挽救婚姻兩頭騰
另外「藍月亮」喺賽前傳出好消息，今年1月曾爆出領隊哥迪奧拿同老婆Cristina Serra結束11年婚姻關係，但近日出現轉機。根據傳媒爆料，兩人只係分開住並未離婚，早前一齊共度復活節假期成功「破冰」，哥帥亦承諾每星期最少飛返西班牙一次陪老婆。