澳職：麥克阿瑟狂鋒大有睇頭_東方日報

澳職上演獨腳戲，FC麥克阿瑟主場迎戰墨爾本勝利，第8位嘅FC麥克阿瑟要盡最後努力，餘下2場常規賽搶分，希望打入前6位參加季後賽，相信會豁出去搶攻爭勝，但焗攻之下，防線難免空虛，加上近4場聯賽總入球全開4球或以上，一於再追中位數3.5球嘅入球大。（無綫82台周五下午5時35分直播）文:Mic少

FC麥克阿瑟落後第6位FC悉尼4分，如果今場贏唔到，基本上無法打入季後賽，今場必定傾力一搏。事實上，麥克阿瑟近4場聯賽合共入15球，同時失10球，名副其實有前冇後，前鋒馬連積高利斯狀態大勇，繼對布里斯班獅吼上演「帽子戲法」之後，上場對中岸水手，貢獻2次助攻。加上另一位前鋒哈利沙耶近3次上陣入4球，鋒線力量強勁，足以撕破對手防線。

勝利近期頻開入球騷
至於墨爾本勝利排緊第5位，僅領先第7位嘅阿德萊德聯2分，季後賽席位並唔穩陣。「勝利」水準比較飄忽，近5場取得3勝2負，當中不乏大手交易，包括近2場作客分別2比4不敵西悉尼流浪者，以及贏威靈頓鳳凰3比2，今仗隨時又會同FC麥克阿瑟合演入球騷。