外圍賽：烏拉圭阿根廷聯手做細界_東方日報

世盃外南美洲區重量級大戰，烏拉圭主場惡鬥阿根廷。「1哥」阿根廷領先優勢明顯，晉級決賽周只係時間問題，近期演出亦有所回落，尤其作客表現走晒樣，連續3場作客不勝，今場喺美斯等前鋒受傷缺陣下，相信領隊史卡朗尼會大踢穩陣波，博2.5球入球細！

（HOY TV 76台周六早上7時30分直播）文:工廠仔

烏拉圭今屆外圍賽僅輸過2場，輸波次數比阿根廷更少，最大原因係防守力強。阿根廷名帥比爾沙擅長嘅逼搶踢法，往往令對手難以有效製造攻勢，不過前鋒達雲紐尼斯近期狀態麻麻，要入波亦有一定難度。

美斯拿達路缺陣先求穩
另邊廂，阿根廷陣中球星如雲，阿歷士麥亞里士打、祖利安艾華利斯等球星都夠晒卡士，不過太習慣由美斯揸弗嘅日子，佢受傷就令成個進攻體系大打折扣，美斯對上一次缺陣阿根廷比賽係上年9月份，當時佢哋就輸畀哥倫比亞。除咗美斯缺陣之外，就連拿達路馬天尼斯都喺賽前宣布因傷退隊，幸好阿根廷依家冇搶分壓力，今仗作客和波都收貨，唔會勉強主攻。加上烏拉圭近6場賽事就有4場「食白果」，當中5場總入球開2球或以下，捧2.5球入球細穩陣。