英足盃：紐卡素白禮頓駁火爭晉級_東方日報

今晚英足盃頭場，紐卡素主場火併白禮頓。「喜鵲」已殺入英聯盃決賽，當然想擸晒兩個本土盃賽，勢必強陣出擊。「海鷗」近況回勇4連勝，佢哋踢法積極，容易製造大比數賽果，近6場作客5次開4球或以上，吼實3.5球入球大。（Now 651周日晚9時45分直播）

紐卡素近期表現飄忽，近8場4勝4負，幾乎場場入球騷，包括上圈英足盃作客3比2險勝伯明翰，同埋聯賽主場4比3擊敗諾定咸森林，夠晒娛樂性。由阿歷山大伊沙克、安東尼哥頓同積及梅菲組成嘅鋒線攻力強勁，但後防丹般恩、法比安舒哈同杜巴夫卡就唔夠穩陣，不過有一點可以肯定，就係「喜鵲」踢本土盃賽特別落力，早前英聯盃4強兩回合「雙殺」阿仙奴，今場點會唔搏。

「海鷗」作客大開大合
白禮頓近期4連勝當中，有兩場係英足盃同英超砌低車路士，但之前又試過作客諾定咸森林慘吞7蛋，認真冇路捉。「海鷗」近4場狂入11球，當中三笘薰貢獻3粒，有力同主隊駁火，尤其近期作客大開大合，入球大冇走雞。