意甲：拉素夠硬淨受讓得米_東方日報

今晚意甲好戲碼，AC米蘭主場火併拉素，A米「新帥效應」消失，近期打回原形，歐聯出局之餘，聯賽亦兩連敗，陷入信心危機，反觀拉素近7場意甲僅1敗夠晒硬淨，包括打和爭標勁旅拿玻里，今場受讓半一必捧拉素下盤。（HOY TV 76台周一凌晨3時45分直播）文:Mic少

A米愈踢愈沉
A米1月初請嚟沙治奧干斯卡奧接手執教，係威係勢捧走意超盃，原來只屬曇花一現，之後表現無以為繼。呢位葡萄牙名帥性格火爆，同前隊長卡拿比亞當眾鬧交，並將呢位出身於A米青訓嘅老臣子外借到博洛尼亞，嚴重打擊士氣。A米愈踢愈沉，近5場僅1勝，單計聯賽近2場不敵拖連奴同博洛尼亞，遇上實力更強嘅拉素，難有甜頭。

拉素正力爭前4，鬥心唔使懷疑，雖然上場意大利盃8強被國際米蘭淘汰，但近4場聯賽取得2勝2和，包括打和拿玻里2比2，相當硬淨，造訪聖西路有力全身而退，甚至贏埋唔奇，受讓抵玩。