歐聯附：多蒙特唔留手再劏士砵亭_東方日報

歐聯附加賽次回合焦點戰，多蒙特返主場再鬥士砵亭。多蒙特今季特點係「歐聯強、聯賽弱」，雖然首回合大勝而回，出線幾乎冇懸念，但遇上歐聯低迷嘅士砵亭，隨時再贏一場，主勝有計。（Now 643周四凌晨1時45分直播）文:法達斯維

尼高高華靠歐聯立威
多蒙特早前怒炒紐尼沙軒，請來鐵帥尼高高華救亡，佢上任後帶隊踢咗4場波，錄得2勝2負，表現依然極度飄忽。就算好似上周中歐聯附加賽首回合，多蒙特作客士砵亭上半場踢到拖泥帶水，易邊後突然醒晒，憑古拉斯、柏斯高哥斯及卡廉艾迪耶美各建一功，大勝3比0，滿以為佢哋重上正軌，但日前德甲對住尾2嘅波琴，竟然淨吞兩蛋，真係估佢唔到。

與聯賽踢咗22輪贏得9場咁曳相比，多蒙特今季歐聯戰績更顯突出，連同首回合贏波，出戰9場獲6勝3負，輸畀皇馬、巴塞唔奇，其餘賽事亦應贏則贏。「蜜蜂兵團」就算出線16強機會高唱入雲，但基於聯賽表現太差，尼高高華仍需要樹立威信，返主場再對士砵亭唔會留手。

更何況對手士砵亭同樣不濟，自從主帥魯賓艾摩廉喺上年11月跳槽曼聯後，已先後委任兩名教頭，可惜戰績未如理想，尤其係歐聯，呢支葡超勁旅喺艾摩廉最後一次歐聯領軍反勝曼城4比1，之後5場僅得1和4負未贏過，首回合又落後3粒，戰意成疑，加上近5次交手4度落敗，再輸唔奇。