亞冠：柏斯波利斯決心搶Ｗ_東方日報

贏波即出線鬥志鮮明
亞冠精英盃B組最後一輪賽事，伊朗勁旅柏斯波利斯主場迎戰沙特豪門艾納斯。今場比賽戰意成為關鍵，排第9嘅柏斯波利斯誓搶3分博出線，相反已經篤定晉級嘅艾納斯大踢「風流波」，今仗作客冇必要同你搏命，撐柏斯波利斯開主W搭上出線尾班車。（HOY 76台周二凌晨零時直播）文:工廠仔

柏斯波利斯依家同第8位嘅艾斯迪格拿同得6分，由於艾斯迪格拿要同揸住8分排第6位嘅艾雷恩互撼，意味柏斯波利斯今場只要贏波就可以出線，目標非常鮮明。呢支伊朗勁旅主場氣勢強勁，對上3次主場都順利贏波，今仗抱住非勝不可嘅決心出戰，相信喺主場球迷龐大聲勢助威下，可望食住個勢再下一城。

艾納斯已獲晉級資格
艾納斯實力強大，已經提早拎到出線資格，今場「風流波」戰意成疑，預計40歲嘅C朗拿度同32歲嘅沙迪奧文尼等老將就算上陣，都會作出適度調整，唔會去到盡，甚至起用青年軍落場磨練，無論心態同陣容都毫無保證，相信破釜沉舟嘅柏斯波利斯可以贏波，放心捧主勝。